चितुवाको छालासहित दुई पक्राउ

दाङ प्रहरीले चितुवाको छालासहित दुई जनालाई पक्राउ गरेको छ। गोप्य सूचनाको आधारमा दाङ देउखुरीको लमही बजारबाट उनीहरुलाई पक्राउ गरिएको प्रहरीले जनाएको छ।

पक्राउ पर्नेमा सिसहनिया गाविस वडा नं. १ निवासी ४९ वर्षीय टेकबहादुर केसी र लालमटिया गाविस वडा नं. ८ निवासी ४५ वर्षीय मुक्तबहादुर थापा रहेको जिल्ला प्रहरी प्रमुख एसपी धिरजप्रताप सिंहले जानकारी दिए।

पक्राउ परेकाले आफूहरु कारोबारी नभएको र अरुको भरिया मात्रै बनेको जिकिर गर्दै आएको प्रहरीले बताएको छ। पक्राउ परेकाकाबारे थप अनुसन्धान भइरहेको प्रहरीले जनाएको छ।